काठमाडौं : फ्रिडम फ्लोटिला गठबन्धन (एफएफसी) का कार्यकर्ताहरूले इजरायली सेनाले गाजा पट्टीमा मानवीय सहायता बोकेको आफ्नो जहाज (याट) रोकेको बताएका छन्। एफएफसीले टेलिग्राम मार्फत रिपोर्ट गरेअनुसार उनीहरूको मेडलाइन नामको जहाजसँग सम्पर्क टुटेको छ।

एफएफसीले एउटा तस्वीर पनि सेयर गरेको छ जसमा केही व्यक्तिहरू लाइफ ज्याकेट लगाएर बसिरहेका छन् र हात उठाइरहेका छन्। यो कुरा अहिलेसम्म कुनै स्वतन्त्र स्रोतबाट पुष्टि भएको छैन। यस जहाजमा अन्तर्राष्ट्रिय वातावरणीय कार्यकर्ता ग्रेटा थनबर्ग पनि उपस्थित छिन् र यो इजिप्टको तट नजिकै रहेको विश्वास गरिन्छ।

यसैबीच, इजरायली विदेश मन्त्रालयले एक्समा एक भिडियो जारी गरेको छ, जसमा यस जहाजका यात्रुहरू सुरक्षित रहेको जानकारी दिइएको छ। उसले लेखेको छ, “सेल्फी याटमा सवार सबैजना सुरक्षित छन् र कुनै हानि छैन। उनीहरूलाई खानको लागि स्यान्डविच र पानी पिउन दिइएको थियो। अब कार्यक्रम सकियो।”

यसअघि इजरायली विदेश मन्त्रालयले आफ्नो नौसेनाले जहाजलाई प्रतिबन्धित क्षेत्रतर्फ जाँदै गरेको र त्यसैले आफ्नो मार्ग परिवर्तन गर्नुपर्ने चेतावनी दिएको बताएको थियो।इजरायलले हमाससम्म हतियार पुग्नबाट रोक्न गाजामा नाकाबन्दी आवश्यक रहेको बताएको छ। फ्रिडम फ्लोटिला गठबन्धन (एफएफसी) गाजाको इजरायली नाकाबन्दी अन्त्य गर्न काम गर्ने विश्वभरका व्यक्ति र संस्थाहरूको एकता आन्दोलन हो।